金太郎 (已結業)

新年快樂！！去尖沙咀睇show倒數完，一行肚餓的人去旺角搵野醫肚，有人提議去呢度，我未去過唔知於是無意見。響迴轉檯坐低，未開始叫見到壽司的賣相已經心知「大件事」，見到迴轉帶所有壽司紫菜全部林的，好明顯已經擺左好耐，壽司已經吸哂倒汗水，唔新鮮；見到有極鍾意食的炸蝦壽司，拎左一碟，蝦幼細得可憐，只靠沾上大量麵包糠充撐，食左一件我已經分哂俾其他朋友。壽司唔得，唯有叫個東京拉麵定食求其填飽個肚就算。碗拉麵D湯唔係滾的，食到三分二已經開始凍。其中一個朋友叫左燒牛肉飯，佢分左件牛肉俾我，食落除左覺得佢地加左點酒之外，根本同茶餐廳／快餐店的牛扒無分別；另一個朋友點左銀雪魚，除左鞋同腥，已經再無第三種味道。佢地的三文魚，顏色暗淡、亳無光澤，一睇已經知道唔得。最驚嚇的係果碟跟餐的所謂蟹子沙律，一來已經睇見出哂水，結果我掂都唔敢掂。雖然睇佢的格局同價錢，食材並不能同高級餐廳比，但都成無理由俾D完全唔新鮮的野客人食卦！咁的水準，早知去茶餐廳食好過啦。