九井壽司 (已結業)

近排好hit大熱嘅火車壽司，唔單止某元x壽司有開express 店，九龍灣呢間九井壽司都係用火車仔嚟運送食物，咁有 gimmick ，貪新鮮既香港人點可以唔玩下試下。一入嚟就見到唔少免費送畀小朋友嘅玩具，有啲貼紙呀筆刨仔咁，雖然已經過咗18歲好幾年既我， 但都童心大發， 拎上手玩兩下， 不過我就梗係唔同小朋友爭嘢玩啦 ，玩完就放低冇帶走到，不過下次如果帶姪女嚟，都可以畀佢玩下。門口當眼處就有大大個廣告寫住有廿蚊海膽三色迷你丼， 梗係要試下啦，平時連鎖店買既壽司，幾嚿壽司已經廿蚊，何況海膽呢。即叫即有，叫完一坐低就好快送上，海膽非常新鮮而且大啖，三文魚同吞拿魚亦相當厚身甜美。三文魚加洲卷，同海膽丼一樣，都係非常足料，大大塊既三文魚加上沙律醬，開胃又醒神。睇住壽司係輸送帶運出嚟， playful 又過癮。非常鐘意睇佢由廚房射出嚟。炸蝦加洲卷，炸蝦脆卜卜，熱辣辣，食得出係即整，感覺好新鮮。炸雞亦都唔錯，熱辣辣但唔油膩，炸得剛剛好。極度推薦海苔魷魚天婦羅， 脆漿同海苔混合埋一齊，包住呢個魷魚一齊炸，由於香脆之餘，仲有淡淡嘅海苔香味，唔會太鹹，味道剛好， 配埋蛋黃醬，仲可以中和食熱氣嘢嘅飽膩感。