ITALIAN TOMATO (新都城中心二期)

营业中

休息中

朋友買咗杜拜朱古力開心果脆脆蛋糕，睇相呃到人，蛋糕沿邊黏滿開心果碎，以為開心果味好澎湃。希望越大，失望越大，切蛋糕時已預計唔係好得，蛋糕入面冇乜開心果元素。根據Italian Tomato(IT)的網站資料，呢款蛋糕有杜拜開心果朱古力夾心、朱古力海綿蛋糕、海綿蛋糕、開心果朱古力忌廉、開心果吉士忌廉、紅桑子醬、開心果碎、開心果朱古力片、新鮮士多啤梨同藍莓。首先，開心果碎唔脆；開心果吉士忌廉的開心果味非常單薄，冇果仁香，似食忌廉多啲。當食緊件蛋糕時，真係有少少想放棄，覺得浪費quota。最有印象係佢的朱古力海綿蛋糕同紅桑子醬，呢2種口味「突」咗出嚟，不過唔「突出」！朱古力海綿蛋糕佔咗呢個蛋糕好大部分，似坊間的忌廉蛋糕。紅桑子醬帶酸咪咪的味道，所以食得出、分得到，但同開心果配搭時就大纜都扯唔埋，味道唔夾。呢個蛋糕的尺寸係15cm，特價$268，以知名少少的連鎖餅店嚟講，索價唔高，但以呢個味道同質素，如果IT諗住食正開心果熱潮而推出，就好難殺出重圍，成為話題食品~就算係想平平哋試下開心果蛋糕，都唔推介，以免失望。