木衛二鑄茶所 (南豐紗廠) (已結業)

自助形式的小店，出去order, menu 好多飲品選擇，好亂，其實我只係想揾個地方吹水，所以我同staff 講，我只想要一杯普通嘅珍珠奶茶，咁佢就話，咁你揀個茶底先，茶有好多選擇，我就揀咗個鐵觀音，之後佢就話咁你再揀要咩珍珠，有兩款，係蜜香同茶香，咁我就揀咗個茶香珍珠，我仲有啲想食野，咁就再order 埋個迷你芝士火腿批，其實坐低咗之後應該係自己出去攞餐，不過staff見我地掛住吹水，所以就送埋餐俾我地，都算唔話得。朋友點咗個玫瑰蛋糕，外形好靚，其實係開心果楓糖朱古力蛋糕，呢個世界呢……要有外在美又有內在美其實好難，所以呢個蛋糕其實好麻麻……,切開有綠色，黃色同啡色，不過食唔倒楓糖同開心果嘅味，只有啲朱古力味，當然唔係香濃嗰種朱古力，而且蛋糕質感都差，所以如果對味道有要求嘅朋友就唔好點呢個了。我嘅鐵觀音珍珠奶茶都幾好，好大杯，個杯好靚，茶幾香，珍珠都煙韌，不過個芝士火腿批就一啲都唔吸引，除咗份量細，芝士無乜香味，酥就更加無層次，不過咁講18蚊又唔可以要求太高。