仲有好多韓星擺設，拍照必備既相架～成個門口都係打卡位！
餐廳地方大又闊落，坐位非常舒適，另外仲有獨立位置可以聚會。
燒肉位都非常大，另外每個爐上都有強勁抽風系統，完全唔怕食完會有燒烤味！
坐底無耐侍應就拎左好多一碟碟既前菜比我地，仲有生菜🥬韓燒必備！
焗雞蛋餅〔跟餐附送〕
熱辣辣上枱，睇住雞蛋由脹卜卜開始縮到變細，非常得意～雞蛋味十足，配上燒肉又係另一番風味！
八色珍味拼盤（牛肉）$698
調味烤裹脊、調味烤排骨、牛舌、雪花牛肉、五花腩（辣椒醬、香草、咖哩、蒜蓉）
擺盤非常精美，視覺效果十足，非常吸引！珍味拼盤一次品嚐不同口味和口感，不錯。
擺盤仲有舊肥膏同少量蔬菜～
先燒五花腩，蒜蓉五花腩既蒜味比較清淡，沾醬汁夾菜食剛剛好；香草五花腩，非常重手既香草醃料，有清新濃郁既香草味，非常香口；咖哩口味非常獨特，咖哩唔辣且香濃，調味做得非常好，令到五花腩別有一番風味；辣椒醬口味竟帶少少甜味，味道較重且惹味十足，配上泡菜同雞蛋剛剛好～
燒完五花腩再燒牛肉，調味烤裹脊、調味烤排骨、雪花牛肉，味道口感非常相似，各有特色，重點係牛味十足!
而牛舌切成薄薄一塊，一燒就可反面，好快就食得，燒得剛好既牛舌肉汁豐富，牛味亦非常特出！
醱酵鮑魚人蔘雞湯 $128
淡淡人蔘味，濃濃既雞味，雞肉鮮嫩滑溜，雞骨髓同骨都可以咬到，非常入味!
湯頭清甜，飲完唔會口渴，仲有少少米飯係底，口感十足！
炒年糕湯 $128〔加莫札瑞拉芝士$20〕
甜甜辣辣既年糕湯，配上芝士即時風味暴增，食到唔停得口，一口接一口！配料有年糕、魚糕、餃子、雞蛋、烏冬⋯⋯非常豐富！每樣配料都非常吸汁，年糕食落軟滑又彈牙，魚糕吸左湯汁無可挑剔既好味道，烏冬非常淋身，非常入味！
毎啖都有芝士拉絲，非常滿足！
燒肉點少得酒！最後飲返杯Somersby Rity $78
賣相非常精美！飲落酒味重，少少既蘋果酒香，非常過癮！
整體全部野食都非常好食，最滿意係炒年糕湯！而且可以試到咁多唔同味既五花腩都係第一次，相信好快有第二次！
