拉麵Jo (已結業)

今日火車壞車，搞到我原本想去北區接男朋友收工號計劃實行唔到，轉為各自返元朗，問題又嚟啦，到底食咩好呢？因為想食麵，搵左唔同嘅餐廳，最後揀左呢間有沾麵食嘅拉麵Jo，原因當然又係男朋友鐘意食啦🤣要試一間餐廳好唔好食當然係試啲最基本嘅嘢啦，所以佢嗌左個最基本嘅沾麵。個湯上嚟熱辣辣，而啲麵就冷麵凍冰冰，呢一下冰火交融實在不得了，啲麵彈牙到呢⋯⋯佢啲腩肉麵好軟腍。唔洗講啦，男朋友好滿意👍🏼餐廳仲好體貼地有張卡通說明書教你食沾麵，實行看圖識字，有心思。而我自己就俾呢碗慢煮叉燒嘅排場吸引左，一上嚟當然試左啖湯先啦，好濃好濃嘅豬骨湯味，真係好濃好似屋企淆好多個鐘果隻味，飲落唔會太油，但可惜嘅係愈飲愈咸。啲慢煮叉燒真係好·好·食，超軟腍又入味。而佢個流心蛋我就覺得一般般，因為蛋心冇甜味，蛋白都太軟身，同埋我果隻冇乜流心，可能因為擺啖熱湯上面啦。小食我又係俾佢個外形吸引左，呢個係成隻蝦嚟做餃子，菜同肉就會相對得好少好少。因為佢啲蝦唔新鮮，完全冇鮮甜味，亦冇餃子味，所以試完就算。我諗叫返普通餃子會好食啲。餐廳環境啲位置比較狹窄，一係風口位，一係就中間啲檯有啲熱。所以食完都快快走，唔會坐得耐。