Bread, Espresso & (已結業)

今日放假同朋友出左去尖沙咀潮聖，事關一包難求既日本人氣連鎖店登陸左香港好一陣，個股熱潮都冇減退過，而佢地既招牌法式吐司仲要係每日下就3點鐘限量供應30份，所以我地跟住網上既排隊攻略去。呢間潮鋪係係尖沙咀漆咸道南達成商業地下，即係科學館對面。佢係以淺木同白色爲主調，裝修簡約，環境開揚。之所以係熱話，係因為佢地既鎮店之寶法式吐司係跟足日本本鋪咁用自家制既法式方包切片，仲要係一日之前浸係用日本雞蛋，鮮奶，糖同忌廉溝埋既蛋槳入面，等個包浸飽同吸收晒d蛋槳再雪佢24個鐘頭。係每日開賣既時候，先用鐵板煎香個面再焗既。Menu招牌法式吐司$68呢個新鮮出爐又熱辣辣既招牌法式吐司，係原個鐵板上既，賣相有d似焦糖麵包布甸。佢色澤金黃，味道香甜，質感軟滑，食落有d似梳乎厘既口感，再配埋清甜既蜂蜜，令個吐司增加左天然既甜蜜味。由於工序繁複，所以限量供應，要食既朋友就要快手啦。另外，鋪頭入面都有新鮮既手工麵包賣，賣相都好唔錯架。