中村藤吉 (已結業)

成日聽到朋友講中村藤吉嘅甜品好出名，要排成3個鐘先入到去，於是放工食完晚餐之後last order前去試一試。7:50 去到等左10分鐘就入到去。茶錢每人收$10，仲要規定每人要叫一樣嘢，但係出名食品都要$100左右，覺得有啲被人㩒住嚟搶嘅感覺。最後叫咗綠茶芭菲(まるとパフェ )同埋宇治金時冰(宇治きん氷 )。講真，所有食品之中我覺得用鑄鐵茶壺裝着嘅$10焙茶(ほうじ茶)最好飲，非常有茶味，暖到入心，其他甜品就不外如是。除咗抹茶まるとパフェ有少少心思之外(呢個甜品入面有好多層唔同嘅食品)，抹茶とほうじ茶宇治きん氷就一啲都唔值，大碗都係冰，仲要俾好少抹茶蜜同黑糖蜜，咁就俾咗$98。餐廳夜景唔錯，幾有情調。喇叭都要 Bose，睇得出店主好有心去設計呢間餐廳。但係食嘢多過食mood，又坐得唔太舒服，同我唔夾。可能我只係排左10分鐘隊，就覺得冇咁矜貴。其他人可能因為排咗三個鐘隊，味道一般嘅甜品都講到天上有地下無。仲有，餐廳裏面其實有好多位置可以開多啲位俾人食嘢，但係就選擇擺放陳無人睇嘅陳列品。可能想吊高黎賣，保持low supply high demand。到此一遊，唔會再去lu。