當文歷餅店 by Dominique Ansel (已結業)

來自紐約嘅Dominique Ansel Bakery 因為佢嘅特色創作蛋糕，紅遍全球，店子更被譽為「一生一定要去一次的麵包店」。嚟到香港，佢嘅創作融合咗本地特色，包括菠蘿包、檸檬茶、皮蛋酸薑、小籠包、火腿通、甚至黑白淡奶（雖然我唔明點解黑白淡奶算係有代表性）。因為朋友知道我鍾意食甜品，所以買咗呢一系列嘅創作蛋糕俾我食。坦白講，造型上的確係花咗唔少心思，但係所有心思都花咗喺造型上面，所以味道就顧及唔到了。每件蛋糕味道基本上分別不大，毫無特色，甚至難食。而造型上係一個gimmick，但我覺得毫不精緻。例如檸檬茶個盒，用上同平時生日蛋糕嘅朱古力生日牌差唔多嘅材料做，呢個生日牌係冇人會食，而家就用來做成個蛋糕外層，咁究竟係想人食定唔食呢？又例如做益力多個樽嘅餅，因為要維持形狀，所以做得好硬，牙力少D都咬唔開。佢哋可以解釋主要係飲入面嘅內容，但係如果我要飲嗰2啖嘢，點解要俾幾十蚊去買一個唔食得又唔靚嘅容器呢？總之呢間嘢嘅蛋糕就得個樣，仲要樣都唔係靚，我完全唔能夠理解點解要排隊幫襯。