甜嫂 (已結業)

昨日一行9位有大有細入去幫襯，好快有位（因為無乜人），因為有啲大人唔食，加埋細路食唔晒一個，所以先點了5 個甜品，隔咗一陣，有位類似經理既物體走近兼大聲講「先生，你哋9位叫咗5款甜品，麻煩睇下有無點錯」！嘩，佢意思直頭係話我哋霸咗佢啲位又幫襯得小啫。當時已經想走（如果唔係有老有嫩），服務態度差之餘，出嘢食又慢，差唔多係我哋每一位食完先有第二樣到，而食品水準就直頭不知所謂，點了一個「紅豆茸雪糕西米露加小丸子」椰汁好少，搞到啲西米好「杰」又淡又唔好食，小丸子完全煮唔熟，係「實心 」。成碗嘢剩係得雪糕係ok,你話死唔死。到最後埋單比錢， 多謝都無句（又係似經理既物體）找錢比我既態度好似叫我快啲過主咁樣，因為成個過程都好不愉快，所以決定在此公告天下，希望大家千祈咪幫襯，其他分店我唔知，但大角咀呢間千祈咪制呢！