MR. MAKI (保和大廈) (已結業)

去開灣仔做嘢，見到vtc附近開咗間新嘅小店，又入去試試新嘢啦，不過因為是日行程比較緊湊，所以就買咗外賣，呢間餐廳呢係可以堂食嘅，都有大概六至八個位左右。今次就叫咗個三文魚轉角遇上蝦嘅套餐，午市時段本身叫完個卷物之後可以加錢轉套餐嘅，分別由三款套餐可以選擇嘅，咁我今次就揀咗加薯條嘅套餐，個套餐除咗半份炸有皮薯條之外，仲會包埋日式沙律同埋汽水，咁今次水晶就揀咗蜜瓜味嘅梳打啦😋😋😋都話呢一個密瓜味梳打都會比較特別👍👍👍 日式沙律呢一個跟餐沙律就不過不失啦，啲菜都新鮮嘅。 三文魚轉角遇上蝦卷物因為水晶唔鍾意食生冷嘢，所以特登叫佢整熟啲畀我，咁廚師都好貼心咁幫我燒熟咗，個三文魚即時燒過都係好嫩口嘅，配埋個炸蝦，口感唔錯，個蝦係即刻炸起嘅，我覺得好脆👍👍👍 有皮薯條（半份）之前都提及過，其實水晶最鍾意嘅就係食粗薯條，仲要係有皮嘅，口感真係完全唔一樣㗎，呢個薯條係即叫即炸，非常之新鮮，正🤤🤤🤤，份量方面，雖然係只有半份，但係都有十幾條👍👍👍 蜜瓜味梳打其實好多日本嘅餐廳都會有呢一款嘅梳打提供嘅，唔算太甜，都幾好飲。 店主話遲啲會推出其他丼飯㗎，好期待呀😻😻😻