Pleka (已結業)

早排朋友請食午飯有心事要傾，我話既然傾心事就求其坐得舒舒服服有嘢飲就ok啦，相約在中環 ifc，我心想：午飯時間 ifc, 訂到位已經是奇蹟，而環境稍為好少少的隨時價錢比食物更亮眼。卻原來今餐朋友訂了這家 @plekahk ，真係啱心水，一來因為未去過，二來坐位安排在靠窗位置景觀開揚，被日光照著甚麼煩心事都容易被溶掉。食物方面，第一件事不得不提，這裡的麵包我認為值得豎起手指公👍🏻 我以前成日會話：要整到啲麵包好食有幾難呢？經過多年不好的餐前麵包體驗，我焗住承認餐前麵包是好難整得好食的…好明顯我被同化了。這裡的麵包將我這身體驗掃除，麵包很不錯，最特別是他們的牛油。餐廳在牛油面上倒了一些蜜糖，嘩！我真係大鄉里出城！從來未試過名副其實的蜜糖牛油，嘩喇！好味到一個點！這些就是我所謂的細心。牛油咋嘛，蜜糖咋嘛，有幾特別啫。其實無乜特別，不過咁唔特別嘅嘢我又真係未見過未試過，所以對我來說，這是比特別更特別。麵包牛油之外，正餐都是中高質水準，頭盤的octopus和湯都很好，朋友點了帶子，我點了大蝦意大利麵，這一餐就算不是有傾偈的目的，為了食而來也絕不失望。