詠藜園四川菜館 (已搬遷) 新店位置

好好好耐冇去食過，記得第一次食係去黃埔分店食，今次係首次踏足本店食午餐，果然冇令人失望。水準超班，重點係價錢好抵食，2個人4碟餸都係120蚊，今時今日都幾難揾。去詠藜園當然要試一下擔擔麵。可惜自己唔食得太辣，唯有叫走辣啦...湯底其實幾清，不過麵條幼身又好爽滑，冇煮過時，啱晒我口味，正。都唔錯嘅仲有過橋水餃。個人一直都比較鐘意食雲吞，無他，街外的水餃皮大都厚過你同我塊面皮，又粉又難食。呢度好在皮薄餡正，而且細細粒兩啖一口，食唔停口。最後撞正2點半下午茶時間，趁抵於是再叫多一個客豆沙鍋餅。見到師傅廚房即炸，豆沙唔過甜，餅皮好脆。有機會一定再試。