大滿喜日本料理 (已結業)

仔仔成日都話要去食放題，又唔知媽咪賺錢辛苦，不過算啦偶爾食下都冇乜大所謂， 今次就去咗觀塘嗰間大滿喜食。食放題嘅，好多時都有唔同嘅優惠，唔同時間當然又有唔同嘅收費，自己係要睇下，我喺呢度唔會寫咁清楚，費事一陣間有朋友仔喺唔同時間嚟咗又話收費唔一樣又鬧鬼我呢度除咗係入單叫嘢食之外，出面仲有個吧檯有好多嘢食。正常嚟講，食放題一定就係食刺身先，呢度啲刺身都唔錯，起碼就係魚有魚味蝦有蝦味，叫嗰啲刺身係都畀得足，冇漏單，可能每個人對食物嘅要求唔同，我就覺得呢度啲刺身都ok唔錯嘅。叫完刺身之後，當然就係食壽司同埋手捲嘅時間，壽司件件都握得好似唔錯，最起碼個樣都四四正正，其實壽司種類就有好多，基本上唔可以食得曬，所以都係揀啲自己同個仔比較鍾意食嘅壽司，啲手捲都係唔錯，而且手捲梗係要盡快食啦。跟住又叫雞肉串燒同埋一口牛肉嚟食，其實好難講啲味道係點樣，因為都係正正常常嗰啲嘅味道，唔會話特別好驚喜好好食嗰種，又唔會話好難食咁樣。最正就係原來呢度有鮑魚湯飲，係唔係原盅燉我就唔夠膽講，不過味道都算ok啦，最起碼見到鮑魚粒啦，放題嚟講算唔錯啦。