東喜茶 (已結業)

如常嘅喺旺角行街，旺角係如常嘅咁多人，天氣咁熱都想飲杯嘢，但係又唔想飲杯普通嘢，見到附近呢間有咁多人排隊就買杯嚟試下囉！ 東喜茶聽人講係大陸嘅茶公司，不過我唔知道，我只係對佢個店舖名有我個名呢樣嘢好有興趣！兩個人買兩杯嘢飲，一店員有介紹佢哋嘅水果茶同埋芝士奶蓋果汁都好出名。芝士芒芒$42一杯，唔平42蚊但都算好大杯，飲落去芝士味道好香好滑，跟住就飲到芒果汁，其實都唔算係完全芒果汁因為有個牌寫住杯飲品係新鮮芒果醬+綠茶+芝士，其實杯芒芒飲落好舒服，果味好純又香。超級水果綠妍都係42蚊一杯，店員遞俾我時有遞埋隻叉俾我，因為佢叫我飲完之後記住要食埋啲生果。水果茶入面有好多水果，有橙有西瓜有百香果有檸檬有蘋果，全部都覺得幾新鮮，茶飲落好清好解渴。要讚讚嘅係佢哋隻杯質地幾好，好硬，如果可以留住隻杯下次用同一隻杯返去買嘢飲，咁就環保得多。