海安咖啡室 (已結業)

星期五，一朝醒來肚空空的，先醒起原來昨晚只吃了一碟沙律、一碗腐竹糖水及好多啤酒。朝早要去上環，順手找間茶餐廳吃個豐富一點的早餐。都幾耐無幫襯過呢度，又來吃吃睇下係米差了。八點左右人已不少，例牌有幾盤別處交來的麵包放在店中間，坐在紅色直角卡位，感覺仍是那樣的老式港式茶記。早餐得一款，是腿通加油包，可以加四蚊轉油多或菠蘿油，就要了油多，同杯茶走。腿通很簡單，兩塊長方形火腿加略硬的通粉，老實講，以茶記通粉來就是一般，至少可以花多少功夫切下火腿絲，又或是通粉可以煮腍少少；油多薄薄的，當然不能與勝香園的相比；杯茶走水準還可以保持，算是挽回一些點數分。埋單二十蚊，煎蛋都無隻，唔算平。離開時再想起，其實以前都是吃這樣的東西，不過可能現在時代進步，出面早餐已做得又豐富又好又多花款，相比這裡十年如一日的，當然是給比下去了。