丸作食茶 (禮頓道)

营业中

休息中

呢日木嘴喺銅鑼灣行街經過見到呢間野新開張，話啲珍珠係即場手製喎。木嘴作為一個當仁不讓既木嘴，一向無深入考究珍珠既味道，所以佢話係即場手製，令我不禁疑惑究竟珍珠既味道可以點唔同法。原本諗住可以睇下珍珠點樣即場製啦，但可惜當時可能已經整好哂，只係見到有位呀姐係度抹野，由即場表演製珍珠變成即場表演抹野。望望餐牌，都幾多選擇，苦思左好耐，最後決定要焦糖琥珀拿鐵，琥珀真係唔知乜東東，睇英文先知係烏龍茶拿鐵。而珍珠要另加嘅，仲有好幾款味可以揀，有款係叫仙人掌珍珠，怕伏的木嘴就唔敢試，揀左竹炭珍珠，雖然都係唔知咩味，但店員話加左竹炭粉會健康啲喎。甜度同冰都有得揀，唔太食得甜嘅木嘴就要左微糖，飲落甜度正合我意，不過就搞到唔太飲到焦糖味喇。茶味就唔算太濃，不過都幾好飲嘅，而珍珠個樣同普通嘅就望唔出分別，亦都唔會有竹炭味，佢俾左其他款既珍珠俾我其實都唔會知。但老實，啲珍珠軟軟地好彈牙，非常有咬口，出面嘅普通珍珠真係無得比。比錢先發現原來新張期間有9折，折完$24，都幾抵玩。幾時會無左個折頭木嘴真係唔知，下次閣下去到無九折唔好屈我吹水呀，我喊嫁。