木津 (已結業)

呢日收工約左朋友食飯，諗唔到食咩好之際見到轉角位呢間日式餐廳，就決定入去試試。店內裝潢幾特別，以木為主題襯返店名。呢日係平日，人唔算太多，比較清靜，好適合同朋友坐底談天。我地各自叫左一份主食，再點左幾串串燒同燒魚頭。朋友點的吉列豬扒烏冬，豬肉肉質幾嫩，烏冬亦唔會煮得太軟身，算是唔錯。本人就點左極上雜錦魚生飯，不過當日冇吞拿魚，就改做帆立貝。魚生飯啲魚生份量夠多，帆立貝好鮮甜，另外兩款魚生都夠新鮮。串燒我地點左兩串燒牛舌同一串可樂牛，牛舌上面鋪滿芥辣沙律醬，唔會太刺激，非常惹味。可樂牛食落略咸，但係燒得好嫩，有肉汁，用黎送酒一流。燒三文魚頭係最後上菜，新鮮燒好，外脆內軟，唔會燒到好乾身。最後我地加點左新鮮檸檬梳打，青檸梳打飲得多，新鮮檸檬梳打都幾特別。