博多拉麵別天神 (已結業)

我除咗鍾意食米線之外，我最鍾意就係食拉麵，但係香港嘅拉麵店成日都會有鹼水味，所以我都唔係好敢試，但係朋友介紹呢間別天神拉麵店，話拍得住日本嘅水準，於是就一於去試吓。望個餐牌唔算太多選擇，拉麵只有兩種風味，豚骨同埋蝦，另外可以轉埋套餐。套餐有兩款小食包括小龍蝦蟹子沙律，同埋餃子，龍蝦沙律加紫菜一齊食，唔錯嘅配搭，餃子亦得出色。豚骨拉麵，湯底真係唔錯，有好濃嘅豬骨湯味，麵質適中，叉燒正常size，不得不提佢嘅半熟蛋真係煮得唔錯，每一樣配料都好出色。蝦味噌豚骨湯麵，湯底同樣出色，比起豚骨湯面嘅湯底，多咗一層鮮味。