台站 (已結業)

話說呀叔我就係荔枝角返工，咁想食台灣野嘅時候就多數食程班長，貪有台妹侍應同我講國語。但食得多正餐有時都想食快餐，咁啱所以我有時都會去呢間新嘅台式外賣鋪——台站，但次次都太遲返工所以食唔到佢個肉鬆芋泥三文治。台站叫台站，可能都因為佢可以立食。之前都食過魯肉飯都唔錯但份量少，不過唔洗三十蚊都冇咩怨言啦。咁呢日就一口氣叫多啲嘢食，就嗌咗葱油伴麵、肉鬆蛋餅同紅油抄手。個題目都係講下笑，我一把年紀就唔立食了，帶上公司食。葱油伴麵個葱油不多不少啱啱好，輕輕有一層包裹住麵條，唔會話太乾，食完就仲有少少油淨，但就咁食的確有少少寡，食咗三十年台食嘅我一早估到，所以都叫定紅油抄手餸一餸。一直都覺得抄手係川菜，上網查下先知台灣都有好多鋪頭有整。呢份抄手個汁都幾甜，唔太覺得有辣味，可能台灣嘢都係比中國嘢sweet d 。埋尾食個蛋餅，肉鬆好多，但蛋餅有少少乾，感覺比較家常。不過埋單先六十蚊左右仲想點，呢個時候新開嘅鋪頭唔容易捱，大家有空都要支持下。同埋間嘢員工十二月尾一月頭已經戴足口罩，相信都幾衛生。