阿元來了 (已搬遷) 新店位置

幾個月前去完台灣，實在好懷念當地既魯肉飯同魚丸，之前已經聽過呢間阿元來了，今日決定黎試下。黎到餐廳門口已經見到好多人等位，拎飛後侍應會順便俾埋點菜紙你，咁就唔駛等坐低先慢慢諗食乜啦。等左大約20分鐘，終於有位了，餐廳非常細，內部裝潢好有台灣小店風味。侍應多數都係台灣人，但普遍都識聽廣東話既。魯肉飯 :坐低無耐魯肉飯就到了，細細碗既魯肉飯非常有風味，豬肉唔會太肥，配埋醬汁熱辣辣話咁快就食晒。冬菇肉羮麵 :冬菇好香口，肉丸唔會好鬆散亦唔會太實，肉羮味夠濃但唔太咸，配埋彈牙既麵條，食完感覺好暖和。淡水魚丸湯 :去台灣必食菜式之一，魚丸湯一碗有兩粒，魚丸爽口彈牙，肉餡夠多汁夠熱，食既時候要小心，配埋落左莞茜既湯，兩粒真係唔多夠咁。紅豆珍珠奶茶 :點菜時有得自己揀甜度同冰度，非常貼心。奶茶茶味香濃，珍珠夠煙韌彈牙，配埋甜甜既紅豆，令人透心涼。總括黎講，呢度既食物非常好味，無得成日去台灣，間中黎呢度食下野感受下台灣風味都唔錯呀。