老鍋台式火鍋 (京都廣場) (已結業)

秋風起，又係時候打邊爐啦！今日趁天氣涼涼地，就決定去食麻辣鍋。每次食麻辣鍋我都想食羊肉，今次都唔例外。我哋兩個人叫咗麻辣湯底，個湯底已經有鴨血同埋豆腐，啲鴨血好鮮甜，湯底唔會話太鹹，辣辣地恰到好處咁刺激我嘅味蕾，未開始打邊爐已經覺得好期待。我叫咗小羊肉片但份量一啲都唔少，兩個人都唔係好食得晒，另外叫咗台灣蒜香腸，呢個真係必食嘅特色台灣美食，第一次用嚟打邊爐估唔到有咁大驚喜。另外亦都叫咗魚皮餃同埋梅菜丸，又係新鮮好味！飲品方面烏梅汁唔會太甜、味道清新，朋友飲嘅冬瓜茶都好清涼，用嚟中和返打邊爐嘅熱氣真係啱啱好。