牛壹台食 (已結業)

今日放工一個人唔知食咩好，經過灣仔呢間餐廳好似幾吸引，於是就一於食得清淡啲入去食個牛肉麵。佢晚市係有套餐可以揀，咁我就嗌咗個古早味清燉牛肉麵，麵條就係關廟麵，小食就係皮蛋豆腐，再嗌埋杯蜂蜜紅茶，感覺好豐富。首先個牛肉麵賣相就已經好吸引，有少少似我地平時食既港式清湯腩，但一飲個湯就有分別，個湯睇落雖然好清，但飲落有好香既牛肉湯味，加埋啲醃菜完全係台式既味道！牛肉肥瘦均勻，油脂既香味好好食，麵條亦都爽彈，呢個麵雖然睇落清淡但絕對唔係冇調味嗰種淡，而係食到牛肉既原汁原味，同港式既清湯腩有得揮！皮蛋豆腐就不過不失，幾欣賞佢啲木魚片俾得好足，令到個口感唔會太單調，我麵幾滿意呢個小食。佢另外都有俾咗一小碟木耳，可以當係開胃前菜。整體嚟講，夜晚一個人食個套餐絕對係唔錯，份量足夠，味道亦都十分唔錯。絕對推介俾未有得去旅行而好掛住台灣既朋友仔去試下！