放工同舊同學食飯，我記得大學時期佢最鍾意食茶木嘅甜品。呢日佢嚟黃埔搵我，就一於同佢重拾舊味😃，幫襯「茶木」。近年茶木嘅環境裝修愈變愈靚，行小清新嘅風格🌱。
我覺得茶木係台灣新派菜嘅代表🇹🇼，就例如當年就係佢引入台式窩夫多士甜品。菜式食物選擇繁多，定價就屬中等水平啦。佢採用手機QR Code落單，方便得多。
我哋嗌咗一個晚嚐二人餐👫($298)，內容都幾豐富，包括一款小食、兩款主食同兩款飲品，另外仲可以追加小食同甜品。
Teawood紅燒牛肉麵，呢個係餐廳嘅招牌湯麵🍜，湯頭濃郁，不過如果微微辣或許更惹味；而手作麵條闊度適中，口感富嚼勁。🥩燉牛肉有三大件，類似牛腱，帶膠質同咬口。同時，佢仲有幾大嚿蘿蔔🥕。
烏魚子元貝手作麵，🍝依個有啲似台灣食到嘅意麵，麵質偏笠身，所以比較易滯。烏魚子口味嘅醬汁頗為特別，同明太子或蟹籽完全唔同，而嗰兩粒煎帶子就幾正，夠鮮味。
台式滷味拼盤，拼盤由雞翼🍗、牛肚、牛𦟌、豆腐、豬腩片同溏心蛋所組合而成，除咗蛋之外，全部都有兩件。佢哋滷得入味，但少鹹。其中溏心蛋唔錯🥚，蛋黃做到不凝固、半流動嘅狀態。
櫻花蝦花枝餅($58)，🦑手打花枝餅質感彈牙，入面堅係有花枝肉，而且用上櫻花蝦提升香氣🦐，蘸埋甜酸汁食，風味十足。
抹茶鮮果流心歐軟($88)，晚餐跟配就平$10。老實講食甜品係今晚嘅重點😛，佢果然冇令我失望，多士盒造型超吸引呢！台灣稱呢款為軟歐包，餐牌介紹餐廳直頭連酵母都好考究，務求達至柔軟嘅質感。🍞平日食多士類嘅甜品好少會食得晒個殼，但佢外脆內軟，能夠將佢完全KO。
抺茶係店舖限定款式🍵，除咗一大球雪糕之外，多士中間仲有流心嘅抺茶忌廉，食落唔會過份甜膩，而且口感順滑。甜品仲配有多款水果，包括無花果、士多啤梨、藍莓、芒果同奇異果，好繽紛🍓。
飲品方面，跟餐可享優惠價。🫖壺裝係有機臺灣高山茉莉龍珠茶(原價$48)，唔係講笑，個茶真係勁好飲，好香醇。佢用上等茉莉花同高山綠茶窖香而成，味道清爽細膩。另一杯係木柵鐵觀音寒天奶茶(原價$38)加珍珠($5)，🧋奶茶香滑、茶底唔澀，甜度適中，而珍珠同寒天就同樣好𡁻。
總括嚟講，呢餐我哋食得飽飽，鹹食水平還好，不過飲品同甜品就真係幾出色，佢個茉莉花茶實在令我念念不忘呢😌。
1
