請坐 (已搬遷) 新店位置

打風前夕的下午同友人去左摩星嶺玩航拍，落返山就去西環搵野食。喺高街附近食台灣野，平時都好少食。去到唔洗等位，但坐近門口好熱，個門又唔關好，吹哂啲熱氣入黎。坐低後侍應比左點餐紙我地，但我地想去左廁所先，廁所得一格，好乾淨有香味，唔錯。之後坐返埋位有個女侍應已經催我地落單，下都未睇完，催催催，咁我地寫住個牛肉麵同魯肉飯先，落單後佢就收哂啲筆，er我地都未寫完，洗唔洗咁急。跟住加多個蛋餅，問女侍應係咪可以雙併，因為張紙無寫，佢就好悔氣咁話就咁手寫雙併邊樣就得，後尾收到張單原來要加6蚊，佢又唔講喎，好憎佢啲態度，大家姐咁款。牛肉麵個湯有啲油但都好味，微辣。魯肉飯夠汁滲到落底，一個人食一碗都幾飽。蛋餅原來好普通，無話一定要食，只係有塊皮卷起塊煎蛋。另阿蕯姆奶茶友人話唔好味，我飲茉香綠茶就普通，都幾苦。叫女侍應拎杯水，想飲時發現啲水好多黑色點點浮滿成杯水，好核突即刻擺底唔飲了。