老鍋台式火鍋 (京都廣場) (已結業)

週日放假，同老婆到銅鑼灣京都廣場老鍋食台式火鍋，火鍋店間格濶落，空間感充足。枱上有QRcode落單紙，掃QRcode就可以自助點選菜單👍火鍋店設有自助調味區，俾顧客自己調製火鍋醬油。火鍋湯底點咗酸菜白肉鍋，另外點咗涮鍋小羊片，鴨血，魚皮餃，韮菜餃各半份，同小食鹽酥一口豆腐，等十分鐘左右，食物就送到面前。酸菜白肉鍋配料豐富，有五花腩肉，醃制大白菜，鮮冬菇，蕃茄，粟米，大葱，寬粉條，五花腩片肥瘦均勻，湯底酸酸地，寬粉條吸收咗湯汁，帶少少酸味，入口爽滑。魚皮餃同韮菜餃有各四粒，雖然唔太大粒，但足料飽滿，魚皮餃煙靱，韮菜餃多韮菜。鹽酥一口豆腐炸到金黄色，細細粒，外層香脆，裡面十分嫩滑👍