龍鳳號 (已結業)

星期六family day，滿心期待要食呢間，然後嗌左宜蘭蔥肉煎餅，砂窩三杯雞加台灣珍珠米（即係白飯啦）。宜蘭蔥肉煎餅，每個都少得可憐。雖然熱哄哄且皮薄，但好硬 😖 餡料淨係食到胡椒粉味，蔥又唔多，肉又唔多，唔多好食，都幾失望。叫得砂窩三杯雞，梗係要有白飯嘅。飯好大碗，而台灣珍珠米確實脹卜卜、粒粒分明，但煮得唔夠軟熟，煮嘅過程水唔夠，令到飯偏硬，𡁻到牙軟，又無飯香 😞 三杯雞味道亦一般。明明係雞脾肉，但煮到鞋口，完全唔嫩滑，仲極之油膩。😖食食下頂唔順嗰個硬飯，嗌左個肉燥湯粄條，滾滾熱湯中嘅粄條半透明，非常軟熟，加埋有蝦米香嘅肉燥，同飯相比真係好食好多。食飽就要食甜品，嗌左個桂花酒釀丸子加地瓜圓，食唔到酒香、亦無乜桂花香，純粹酸酸甜甜，丸子、地瓜圓算軟熟，整體而言只可以話一般般，唔值呢個價。環境叫注重設計，尊重畫師，尊重設計師 👏🏻 但餐廳最重要始終都係食物味道同質素，所以都有改善空間。