Igatti (已結業)

第一次食嘢嬲到忍唔住要喺openrice開個account，分享呢個拿破崙有幾難食！首先佢一件咁細件嘅拿破崙要$58，已經偏貴！但價錢都唔重要，你畀番咁上下嘅食物質素我，貴啲有咩所謂，但係呢個真係垃圾到不行！首先佢個皮係淋到拎起已經彎咗， 佢本事剧每層酥皮有唔同層次，外面幾層係淋到彎咗，而中間有D皮係煙韌嘅，冇睇錯酥皮可以煙韌，而且仲好大陣雪味，真係唔知佢擺咗幾耐！ 再加上佢個綠茶同個吉士醬完全唔夾，怪味之餘仲有些少膠味同埋好實，唔知係咪落咗好多魚膠粉整實d cream， 成件事真係唔知佢搞乜嘢! 之前因為見到雜誌介紹，所以想試下，冇睇佢其他食評，宜家睇返先知中伏， 已經有好多食客都話咗啲皮係淋嘅，唔怪得之冇人買大size啦，細嘅都咁難食，點會嘥錢買大架?！而且話好食嗰啲全部都係細件裝，都唔知係唔係呀雪姨嗰類人收咗錢揞住良心寫嘅 ?! 傳媒嗰啲介紹...真係唔好盡信! 唉！