平日晚飯時間黎到，客人唔算好多，雖然我地未齊人，但感激店員都提議我地先入座，態度很好。餐廳位置唔算好大，座位唔多，有部分梳化位，有幾張大枱，可以容納嘅人唔多，所以如果人多，都建議你先行預約。裝潢方面普普通通啦，一般小菜館、火鍋店格局，枱與枱之間空間感足，而且有足夠位置上菜，唔會感到局促或者逼狹:)
因為有兩位朋友公事在身，遲左少少，我地兩個一路等一路睇住餐牌，店員都擺低花生、滾水等我地食住等、洗住野等。最終朋友都遲左大半小時，我地都唔係幾好意思，好在唔係週末，否則都怕影響人地做生意呢，畢竟都佔住張枱咁耐。感激店員唔催唔趕，而且服務很好。
餐牌方面供應火鍋、小菜，火鍋湯底、配料選擇都幾多，定價合理，不過朋友話唔想食熱氣野，所以我地轉投小菜懷抱。
小菜驟眼睇都幾多款式，有魚有肉有菜有海鮮，平均七、八十蚊款，除左個別海鮮、魚定價較高之外，其餘都幾公道，我地四人最終就人均二百左右，都食到捧住個肚走。
啫啫雞煲 $88/細
因為唔食火鍋，但又想要啲有鍋氣嘅餸，我地點左個啫啫雞，即時做起，新鮮熱辣，個煲仲滾架。
雞肉份量不少，而入面仲有豬潤，都幾少見。雞肉啖啖肉，都幾嫩唔老，加少少椒絲，幾惹味。
啫啫煲就唔係乾身嗰啲，食落唔會dry，而且好好送飯
咕嚕骨 $78
咕嚕骨係推薦款式，平時我都好鐘意食咕嚕骨，不過唔係間間餐廳整得好食，呢度嘅水準唔錯，可以一試。
咕嚕骨驟眼睇落份量就唔係好多，不過幾好肉，唔會好大舊骨。肉質都幾腍，唔老唔痴牙，菠蘿酸酸甜甜，好開胃。
最香要係佢地嘅醬汁調得幾入味，除左一般咕嚕骨嘅酸甜，仲多一份好似「拔絲」嘅蜜糖甜美
椒鹽牛仔骨 $88
牛仔骨方面佢地有三種做法，定價一樣，可選椒鹽、黑椒、燒汁。
牛仔骨就稍為失望少少，一來份量唔多，而且比較大塊，唔係太方便食用；亦可能因為較大塊，比較難掌握熟嘅時間，變相牛仔骨食落有少少老，有少少韌，唔係好離到骨。椒鹽嘅鍋氣都唔係好夠，上枱時蒜蓉都已經腍身，唔夠香口
豆腐火腩 $78
因為平時同女朋友食飯，都好少可以食到豆腐火腩（因為佢唔鐘意食），同朋友出黎食飯，點菜自由啲，一於整番個佬的代表。
味道而言就中規中矩啦，腩肉都幾多，略嫌唔夠香，但都唔會太肥膩；豆腐滑溜，正常水準。
香煎芙蓉蛋 $68
見過前面有食評介紹過，加上有其中一位朋友係飯桶，點左一份等佢送下飯。芙蓉蛋嘅配料都幾多，又有火腿呀、洋蔥等，煎蛋表面都煎到金黃色，蛋香一般，同埋唔知道裡面有朋友唔喜歡嘅韭黃，結果幾乎係我自己食哂咁濟。
什菜粉絲煲 $72
因為唔知兩位遲黎嘅朋友想食乜菜，為免煩惱，我地點左個什菜煲，最穩陣，菜心、生菜、西蘭花等都有，而且又有粉絲、湯底送飯。加上有少少菇菌、蝦米，都幾香、清甜。
金銀蛋浸時菜 $65
本來想食我至愛嘅小白菜，不過店家剛好未有供應，咁就揀左比較特別嘅皇帝菜，一般都係打邊爐先會食。
菜嘅份量都幾多，加有菇片、蛋，清清甜甜，中和油膩感。
避風塘魷魚鬚 $88
呢份係見隔離枱客人點左，我地見到覺得幾吸引所以點嘅，果然冇令人失望
驟眼睇份量就唔係話好多，但魷魚都大條，而且最香要係好有鍋氣，炒得嫩腍，完全唔韌，加上蒜粒，少少青椒、洋蔥，幾惹味，我地都食唔停口。而且幾有誠意係佢地連青椒、洋蔥都裹粉炸過，連配料我地都食埋，推薦呢款
白飯 $10/碗
汽水 $12/罐
餐牌：
