秘坊 (已搬遷) 新店位置

荔枝角又一間只營業到傍晚的餐廳, 今日終於夾到時間早D食晚飯試下呢間評價不錯, 位置也算方便的車仔麵(仲有另一間又係唔開晚市加評價非常好既車仔麵店 - 賞麵我都好想試)。秘坊last order係17:30。我地📱打電話落單, 老公話一定要提下由落ORDER到取餐, 佢地既服務態度都非常好, 親切有禮。我點左豬紅, 蘿蔔, 牛栢葉豬骨湯河粉。老公點左咖哩魚蛋, 卥水豆腐, 豬軟骨綠豆粉絲冬蔭公湯。豬骨湯底清甜好味, 感覺有落足料去煲。豬紅有入味, 牛栢葉新鮮厚肉爽口, 蘿蔔無渣, 不過覺得可以再煮耐少少, 等D蘿蔔可以再入味再淋少少。而河粉就比較遜色, 痴埋曬一舊舊。老公就話佢點既綠豆粉絲好味, 放耐左都依然順滑彈牙(下次我都要加錢轉食佢)。🇹🇭冬蔭公湯底也值得推介, 酸辣度適中, 泰式香料也落得剛好。而配料當中最愛卥水豆腐, 卥水汁完全滲入曬D豆腐入面, 非常入味, 軟硬適中。秘坊價錢實惠, 用料新鮮, 用心烹調每一樣食物, 一定會再幫襯。