奇納百川 (已結業)

今日同屋企人出尖沙咀行街順便去睇吓有咩聖誕禮物，發現到原來L C X裏邊有一間韓國菜仲可以望到海景好舒服，所以就去咗試吓啦！一入去就已經俾佢個炸醬拌烏冬吸引住當然要要返個試吓先啦。另外叫咗韓式醬油元蹄，海鮮炒粉絲，同埋一份煎餃子。韓式醬油元蹄即係我哋平時見到嘅豬腳，豬個入口都好結實，而且醬料味道好特別，應該係特登溝咗韓國嘅包肉醬同埋芥末，配合返QQ嘅外皮不錯吃。煎餃子入口脆卜卜，就算隔咗一段時間食外皮都唔會淋晒，餡料裏面有高麗菜韭菜豬肉同埋粉絲，都幾Juicy㗎。韓國炸醬烏冬好特別，入口帶一點鹹，不過有清爽嘅青瓜是中和返所以都唔錯，佢嘅烏冬唔會炒到爛蓉蓉，而且帶子超級大粒，作為主食都唔錯㗎。海鮮炒粉絲係我個人超級推介，炒粉絲入口超級惹味，未食入口已經聞到好香嘅麻油味，而且海鮮都好多，配合返口感QQ嘅韓式粉絲超級正 ！另外我哋都叫咗兩杯嘢飲，兩杯都好出色㗎！菠蘿椰子沙冰入口清爽。甜橙蜜糖梳打蜜糖味好突出，配上奇亞籽，入口清新之餘仲可以減肥，來講我覺得餐廳嘅食物質素都唔錯，而且仲要對住個咁靚嘅維港大海景，黃昏喺度食嘢真係一流，大家如果有興趣都可以去試吓㗎！