我同朋友預先book咗2100-2330的時段, 準時到達, 唔使等位就可以入座~
估唔到星期六食2100時段的人竟然唔多, 身旁的人都係食上一個時段, 所以食食下就越來越少人, 唔會太嘈。當然本身檯同檯之間都算迫的, 係咁好彩我地的一檯食到一半旁邊已經冇其他食客。
1
食物選擇唔算少, 係冇焗蠔, 但有焗青口, 可惜我叫焗青口係漏單的, 無緣一試...
食得放題我通常都係會選擇一啲比較穩陣的刺身, 例如三文魚, 劍魚腩, 螺片, 甜蝦之類...(希靈魚呢啲中伏之選就冇叫)刺身冇用冰底上, 但入口完全OK的, 三文魚有鮮味, 甜蝦比想像中大隻, 係普通蝦的size, 有一刻覺得"咁得意"嘅, 可能係我太耐冇食放題吧...甜蝦就唔好食蝦頭了, 會腥, 但蝦肉夠鮮甜, 好食!! 劍魚腩同螺片都好穩陣, 之後再叫多轉, 試埋吞拿魚, 同一般的差唔多, 會有少少腥。
天婦羅一上時都仲係熱的, 粉漿略厚, 但食得放題我都冇特別要求, 起碼啲蝦係爽口, 南瓜同蕃薯都可以, 係乾左啲。
其他例如左上的紫薯餅都好好食, 炒菜有啲過鹹, 但炒雜菇好香牛油味。而牛舌竟然唔難食同唔韌, 放題而言算難得(雖然賣相頗差), 而牛肉串都好食, 係有一舊好多筋。
值得一提係芝士年糕, 連埋煉奶上, 入口真係好好食!! 雖然我相信呢啲食品間間放題都係咁上下來貨...但有煉奶加上熱辣辣的感覺好正!
蟹子沙律一個細碗裝, 入面啲蟹子同蟹柳多到...抵食, 可惜青瓜絲雪的太凍, 影響了口感。
另外冇影的一樣推介係枝豆, 呢度啲枝豆同出面日本餐廳的單品枝豆有得一拚, 我同朋友叫左三碟!! 整枝豆好容易, 但真係有放題會整得好難食的...=.= 呢度整得好好!!
再要一提係呢度係有雪糕供應的, 係雀巢小杯裝, 不過侍應唔會主動提及, 我地都係見到附近有人食先問侍應, 然後佢就話我地知可以去雪櫃拎。
服務方面, 可能因為我地個時段已經唔多人, 侍應好快手, 會主動幫你換碟同跟單, 漏單係得焗青口(我自己都唔記得有叫, 走左先醒起), 感覺唔錯。不過雖然放題至2330, 但經理2245已經同你講last order的。
總括而言感覺唔錯, $240唔算平, 不過可以一試~
