定食8 (已結業)

其實已經開左一段時間，不過位置縮埋一角唔多起眼，唔係去Toilet經過，都唔知佢嘅存在。同屋企人試試，價格經濟，如不加一就更抵。先填好點餐紙出門口付款，用餐時間50分鐘，應該係出單時間起計⋯⋯啩。聽說炸蠔好味，單點一碟，係鮮炸「辣」口嘅，可惜醬太孤寒同有點不搭，如果配深色的那種蠔專屬醬汁就更美味。哥哥嘅炸蠔咖哩豬排定食，對於我就覺得份量充足，咖哩汁唔算多不足撈飯，食到尾聲至發現炸皮跟豬排之間有芝士，哥哥話幾好味，白飯同湯、沙律菜可到自助吧無限添食。而我就要了唯一一款魚生飯，兩隻赤蝦同帆立貝甚有驚喜，新鮮又有睇頭，但其他魚生一般般，有渣嘅，都係嗰句「甚麼價錢甚麼食材啦」。兩款魚定食為兩老嘅不二之選，加一後才50多元，份量十足一定食得飽。