君旺燒臘茶餐廳 (已結業)

木瓜湯，估唔到今日例湯會係木瓜喎。當水果食我都會，但我最憎就係用木瓜煲湯，唔喜歡個味道。但依個例湯無嗰隻味喎，味道似普通瓜湯，反而好好飲，我好喜歡。可能係用生木瓜同甜到漏既熟木瓜煲湯既分別，生木瓜返而較適合。油雞髀乳豬飯，都係切雞髀好食啲。鼓油雞味道較為咸，甜味就唔多覺，而且肉質無切雞咁滑，不過雞味依舊夠香濃、口感都還可以。乳豬脆卜卜，不太肥，肉味濃，好味，點埋乳豬醬撈飯食，正。小插曲，見六個操國語食客，男女老幼同侍應阿姐雞同鴨講，原來好多香港人係唔識聽國語架喎，見無一個員工幫到忙，最後唯有手指指菜牌，再落錯埋 order，先搞清楚佢地食咩。本身我想幫吓口，見佢地搞到如火如荼，我都費事插咀，只送他們一個友善又無奈既微笑囉。原來係依個年頭仲有好多人係唔識聽普通話呢。