東羅 泰館 (已結業)

見哩間咁多好評，一心諗住黎試下哩間泰國菜。星期日大概一時多到達門口，見店內都有好幾台吉枱，於是直接向其中一位女店員表示兩位，但女店員就話都要先攞張飛，咁當然無問題啦，問題攞完飛企咗喺外面等左五分鐘都無人理，當中五分鐘三位唔同嘅店員都望到我地，但無反應。直到有第二堆客人黎到，又係好似我地咁被要求攞飛，但佢地可能係俾另一位店員安排入座嘅關係，好快就入得。好啦，坐低後我地二人嗌左炭燒肉眼牛丸船河，同埋豬手飯，另外加左生蝦同埋單骨雞翼。生蝦同單骨雞翼先黎到，賣相味道都ok，生蝦亦無雪藏味。相對豬手飯同船河就比較普通，不過不失。特別係船河嘅湯底有點太淡，但尚算仲飲得出嗰種「泰國味」，如果可以濃返啲就好啦～另外有一點，幾位最常喺樓面出現嘅店員都比較無表情，有種冇釐神氣嘅感覺，但總算無覺得佢地無禮，至少我地無咁覺得。總括黎講，暫時都無覺得會再黎食嘅機會，有種覺得佢地買好評嘅感覺。