滾喜火鍋專門店 (已結業)

話說已經差不多一年冇食雞煲，喺朋友推薦下就試吓呢間係旺角嘅滾喜雞煲邊爐。通常一般雞煲都係食完雞之後就叫餸打邊爐，呢度食完雞之後嘅火鍋係任食嘅，完全唔使就住就住，堅係正！我哋一坐低就揀咗一個麻辣雞煲同一個芝士雞煲。麻辣雞煲就正常嘢，至於芝士雞煲就十分濃芝士味，食落真係幾正！呢度嘅雞煲肉比較多，啱晒鍾意啖啖肉既我！食完雞煲之後，就開始打邊爐。我哋揀咗個最高級嘅安格斯牛，仲有得食埋美國桶蠔。牛肉都幾出色，而桶蠔就真係勁大隻，有成隻手掌咁大。其他食物都算唔錯，牛柏葉同水魷就特別新鮮。至於飲品方面，都有幾多選擇，好似竹蔗水，檸檬茶，烏龍茶，涼茶同汽水等等，實有一款啱你飲戰鬥左兩個半鐘之後，我哋全家人都捧住個肚走，啲員工亦好好相與。總括嚟講，滾喜係少有嘅抵食雞煲加任食火鍋，如果大家想食雞煲，都不失為一個唔錯嘅選擇！