係熟食市場（街市）入面，舖頭都已經關門，懷疑緊自己係咪去錯地方既時候。。終於俾我地揾到佢啦！！
坐落於一角，門口有一扇好搶眼既黃色鐵門，出面重擺放咗2人坐位既枱櫈，門口對出有射燈射落地下，話你知佢地重營業緊😆
入到裏面，雖然地方不大，但幾別緻，睇得出佢地有用心設計同佈置過，好明顯係足球迷😎
餐廳最重要既當然係食物啦！！
主打食物係可以任你配搭既意粉/意大利飯，先揀意粉或飯，然後揀汁，再揀配料，呢種形式幾得意
除咗意粉或飯，佢重有沙律同小食揀，唔想食咁飽，揀呢啲都唔錯。而飲品都有唔少選擇！
一場黎到，就梗係要試主打既意粉啦～我同朋友既口味太接近，兩個都係食同一樣既配搭……黑松露汁意粉配真姬菇+牛柳粒。
由於厨房位好接近，所以厨師煮緊既時候已經聞到陣陣既黑松露香味
品嘗後，覺得醬汁香味濃郁，意粉不會過熟，咬落煙韌，朋友就略嫌質感稍硬，但本人係幾喜歡的！
至於配料都唔算少，牛柳粒有5-6粒，菇都有好多 😊
飲品方面，見到有“蝶豆花”，好似未試過，當然要試下啦 😏 揀咗呢杯“最終幻想”（荔枝蝶豆花特飲）。有微微既酸，唔太甜，幾清新，啱我
而朋友就揀咗“手搖菠蘿檸檬紅茶”，比起我嗰杯甜好多，幾重菠蘿味，對於好甜既朋友黎講，相對地適合 😂
總結：自選意粉/飯有特色，食物飲品味道不錯，重有得包場添
