夫妻沸片-台式麻辣火鍋 (已結業)

同朋友出黎食晏，黎左夫妻沸片食台灣野，雖然係火鍋店，佢晏晝都有粉麵飯食㗎。入座後店員比了一個QR Code，可以自助落單幾方便，落單介面清晰易用，幾好喎。點了午市套餐，朋友揀了飲翡翠檸檬烏龍茶，酸酸甜甜茶底香，朋友話幾好飲。自己轉左特飲御翠烏龍珍珠奶茶，哈哈，食台灣野就係要飲珍奶。烏龍茶底果然好香，茶夠濃，揀左走甜，真係連珍珠都唔甜㗎，真走甜正呀。朋友點左美國肥牛配自家制溏心蛋飯，第一眼個感覺係好多肉！係金菇肥牛呀～用個甜甜地嘅醬汁煮熟，肥牛嫩滑正啊，份量仲好多添呀！滷肉飯連溏心蛋，肉沫香口肥美，飯粒係珍珠米，綿綿的好味。另外仲有涼菜一份，係酸青瓜同蘿蔔，酸酸的夠開胃。自己點了夫妻麻辣湯半肚半肉配微辣台式乾拌麵，雖然望落好紅，但都係微辣咋。要左半肚半肉，可以揀全肉的。麻辣湯底少少麻少少辣幾香口，肚同肉都入味嘅，個人覺得可以再辣啲。拌麵同樣係麻辣口味，麵條彈牙，加埋個麻辣醬汁好惹味，仲有隻綿綿的溏心蛋。配菜係鴨血同豆腐，鴨血嫩滑，豆腐厚實，不錯吃。非常喜歡鹹蛋黃嘅朋友再加左一份黃金炸魚皮，即叫即整熱辣辣，勁濃鹹蛋黃味好正，作為小食份量不少呢。現在環境勁靚，枱又濶落，真係好食又好坐。