拉麵Jo (已結業)

今日去左elements，睇戲前諗住食少少野，本來想去果間原來無位坐！見到對面有拉麵又唔係好多人，所以就諗住食番碗。聽過呢間拉麵店個名不過未食過。入座既時候雖然已經2點幾，但又未到下午茶時間，到差唔多食完先聽到店員話轉餐牌。都有幾款套餐揀，但都要百幾蚊。最後揀左特製沾麵配餃子餐，唔包飲品但一坐低都有杯茶既。煎餃子一客得3隻，都煎得幾香，不過就同平時食既一樣，都係韭菜豬肉餡，無乜驚喜。到主角沾麵黎到，首先個湯唔夠熱，望落去係好濃，但食唔出有咩香味，只覺得咸，可能咁就係特製-_-。個湯唔夠熱已經無左沾麵既精髓。之後到個麵，質地淋，唔夠彈牙，沾麵既麵應該係比一般既麵彈牙，可惜佢一D都做唔到。份量大，但口感唔夠好，唔覺得自己食緊沾麵。加上食既時候係咁有蚊滋仔飛飛下，搞到好忟，顧到食但又無手趕走隻蚊滋。店員都見到我好狼狽，但又無諗住做D乜囉。埋單152蚊，食左個唔好食既沾麵，無下次。