麵麵店 (已結業)

遲幾日要見人，又難得就到時間，#小秘書 今日準點收工去做facial💆‍♀️ 可能太耐無嚟，美容師喺我面上花嘅時間尤其耐，離開美容院嘅時候已經差唔多19:40。為免夜咗返屋企mammy要為我特登開爐，就不如食碗麵先返去。咁啱商場新開咗「麵麵店」，我就比多次機會佢😌新店選用手機自助點餐，人客只要用手機影抵個QR code就可以點嘢食，雖然係咁，整個過程最終都係要靠人手，一來有啲人唔識用、而比錢嘅時候，系統唔識比指令喺手機過數，到頭嚟都係要搵店員嚟幫手嘅🤪 新店嘅 #車仔麵 味道有改善，唔似得「太古店」嘅食物得個死鹹😣 雖然車仔麵上枱嘅時候乾爭爭咁🍜 不過只要撈翻勻再加啲菜寶粒，味道都唔錯😉 不過啲 #酸齋 似乎未醃透，淋身少少會比較理想。至於價錢就有啲取巧，明明寫明「限期優惠-至抵3餸套餐」，但係好多餸菜都要另加錢嘅，唔似得舊時咁均真，食咩餸都一個價🤔 最終$49埋單... 唔係特別貴，不過下次都係食返麻辣米線比較啱我口味囉😅