地點俾想像中難搵，雖然都好近地鐵站但就咁睇真係唔知上面仲有間私房菜。上到去真係人地屋企既格局，真係係度住都幾方便喎xD 大廳有2圍枱，兩間房各一圍，都幾private幾感覺！
有專業book柗經驗既朋友仔已揀左菜單，事先俾左＄2000 deposit，去到就坐低食！
﹣前菜6小碟：有腌苦瓜（但一D都唔會，仲好爽脆，唔知佢點整的＠＠）、炸魚仔（好香，搞到想黎番碗白粥）、沙律（甜既， 中式前菜黎講都算少有...唔似中式野，沙津醬太多）、菜甫青瓜（爽甜的加左少少醋，唔係重口味既拍青瓜但都幾清新）、烤麩（好味，係上海菜館果種，但佢凍上同埋無咁咸，帶點甜味），最後一個唔記得左
﹣一黎就黎功夫湯， 個個都以為係茶點知見一人一壺先知係出名既湯，個個黎到必飲！是晚係雞腳花膠，好香濃，飲完咀邊黏黏地，完全feel到花膠既膠質～打開壺蓋見到入面既材料，都有D花膠塊可以食到！同埋雞腳煲到超淋，都有膠質，好好味啊！
﹣燒大蝦：overall都係調味得相當恰當，而且大蝦好新鮮，肉質鮮甜。
﹣金菇帶子（其實我真係分唔清帶子同扇貝，總之都係果粒白色野xD)：油左D，但因為淋既係蔥油所以好香，帶子煮得剛剛好，金菇亦吸左蔥蒜香比起粉絲配搭得更好。
﹣金沙骨：btw佢D送全部分好晒先逐位上菜的，所以金沙骨都係一條條rib分好左先上。 但食落發現佢唔係一大排ribs煮完切開，而係本身都已經一條條煮！所以每條既4面都有烤過，醬汁同芝麻都鋪左係上面；肉好易離骨，但肉質又唔會太鬆散，OK！
﹣菠蘿魚塊：有D似咕嚕肉既味，就咁望落都唔知係豬係牛係魚，估唔到咬開佢係白雪雪好滑既無骨魚肉！旁邊有一堆白色既糖絲， 好似龍鬚糖既糖絲咁，如果想要多甜既可自行添加配搭。
﹣菜..同金菇again：比較失望既菜， 一黎repeat左材料，二黎太油，味道OK既但無乜特別。
﹣炒飯：前面既小菜都太好食，顯得呢個飯好普通，而且分小份後而且凍左，飯一凍就偏硬，香味都無晒。
﹣甜品：係蘭香子底既椰汁西米露，但首先椰汁味唔香，中間果橙色物體在座8位都食唔出係乜野，又係無味；西米露好淡，無甜味無糯味，佢雪得幾凍下所以更加食唔到有咩味... overall係飲左D杰杰地既無糖糖水既感覺...
結論：熱既炒菜真係好味，湯係最最高分的！但去到普通既青菜炒飯就令人失望，甜品甚至係小妹都整得好食過佢，有臨尾香既感覺... 一開始係咁抬高你對下一道菜既expectation，點知就相反。
一係上菜次序調轉，一係真係改善下後幾道既質素。
