六叔燒鵝 (已結業)

一直都少食燒鵝, 一年都只係淺嚐一次半次, 原因當然係自己知自己事, 我老人家身體唔係太好嘛....但自從近期係銅鑼灣返工, 係鵝頸橋鄰近食過兩三次質素唔錯嘅燒鵝之後, 身體又無咩痛喎, 豬蹄矛痛喎, 於是心雄膽大咗, 今日就走去屋企隔離街嘅六叔燒鵝同女友小熊開餐.我想食燒鵝脾, 其他由小熊話事, 點咗燒鵝下裝, 一碟乳豬叉燒飯.一入店舖經過樓面, 見到一大盤我大愛嘅蔥油! 顏色翠綠吸引! 即刻食指大動!先講講叉燒, 落單時忘記要求肥叉, 上枱嘅係瘦叉, 外相以為口感較實原來入口鬆軟 juicy, 當然要點埋蔥蓉一齊放入口啦!香港興什麼飲食健康, 肥叉同燶邊叉好似變得生人勿近, 眼前嘅叉燒有少少燶邊, 相信要迎合番街坊要求.乳豬皮脆肉嫩, 而且份量比預期多, 滿意.燒鵝上枱時仍然係暖, 我見到d燒鵝從店舖最入攞出嚟, 偷望到入面有瞥爐, 相信必然係自家燒制, 夠新鮮. 而鵝肉鮮嫩入味, 皮脆, 鵝油送飯一流!最後緊係講講主角啦! 初時擔心d蔥蓉過咸, 實在太多燒味店d蔥蓉過咸, 所以唔敢要求太多份量, 好彩六叔嘅蔥蓉味道適中, 配合叉燒一同入口係絕配.蔥蓉, 唔係只係點油雞㗎!喂喂喂!