上碟砌得好靚，未食都開胃～
🔆一口和牛串 - 牛味無被調味蓋過，肉質仲好嫩～
🔆車厘茄煙肉串 - 煙肉同車厘茄永無甩拖，清新酸甜惹味集於一身～
🔆韮菜燒 - 燒熟左都仲好香韮菜味，菜汁同調味喺口中混集，好正～
🔆燒原隻魷魚串燒 - 魷魚🦑好香，仲好有𡁻口，又唔會太靭。
🔆燒東菇 - 串燒必叫，因為東菇水份濃縮左，燒過嘅菇味係超級無敵勁重，正！
🔆串燒秋葵 - 燒秋葵唔係太多地方有，就算有都好難燒得好食。我唔敢講呢度燒得最好食，但起碼熟度夠又唔燶，調味唔過咸但夠惹味，竹簽仲固定得好好～
🔆串燒雞腎 - 口感好似雞軟骨咁脆，細細粒，送嘢飲一流！
🔆香蒜燒鮮鮑魚 - 招招積積，鮮鮑魚唔同乾鮑，係食鮮味，就好似呢間吧咁，加少少調味已經好好食～
🔆鹽燒鯖魚 - 呢個又係我最愛，燒到魚皮魚肉都好香，魚鰭卜卜脆，點埋酸酸地嘅醬油，perfect!
🔆燒羊架 - 第二最愛，7成熟真係剛剛好，軟腍腍又不失肉嘅口感，惹味滋味夾擊～
🍻第二日仲要返工，朋友飲左蘋果酒界CP值較高嘅Angry Orchard Apple Cider，偏酸帶甜，我唔飲得酒就小學雞地飲柚子梳打。
✔️環境唔錯，近門口位置好開揚。
回頭指數：⭐️⭐️⭐️⭐️
