漁釧 (已結業)

今日同中學同學食飯，之前有時搵佢幫手，今次請佢食飯佢發板，佢就揀咗呢間日式餐廳。望吓餐牌價錢都可以接受，壽司拉麵燒物乜都有，我哋就叫咗一人一個熱辣辣嘅拉麵同烏冬，兩個三文魚手卷同埋一份金菇肥牛卷🤗手卷到啦，三文魚肥美細滑，脂肪分布唔算平均，係就係幾大塊不過味道略為偏淡。呢個係醬油濃雞白湯拉麵，湯底勁鮮甜，不過湯嘅份量太少，好快俾啲麵吸乾，食慢少少都杰撻撻，但係味道一流，濃郁嘅雞味帶甜而不鹹，叉燒就一岩一忽，脂肪比較多，個人喜好比較鍾意食瘦叉燒，不過湯底搭救，最怕啲拉麵成碗都係油，呢碗無乜油岩曬我。呢個海蝦天婦羅配到庭烏冬我就覺得麻麻地，烏冬湯底味道偏淡，只食到輕微嘅醬油味，發揮唔到烏冬嘅極致，本身好鍾意食烏冬嘅我竟然食淨😫因為真係太淡，天婦羅都冇味，麵衣似乎未能鎖住蝦肉嘅鮮味，同埋冇乜調味料，味道淡上加淡。。金菇肥牛卷就極大對比，呢個激鹹，肥牛過瘦鞋颯颯，金菇份量太多令調味料未能覆蓋所有食材，即係咬開入面啲金菇係冇味，但出面啲金菇係好鹹，比較覺得奇怪嘅係佢落咗黑椒，因為通常食開嘅都係燒汁，加埋黑椒感覺唔似食緊金菇肥牛卷，似係食緊黑椒牛仔粒嗰隻味。