川辣皇 (已結業)

出咗旺角按摩，按完摩就約朋友食飯啦～同辣妹子食飯就當然揀辣嘢啦！🥰🥰😜路過旺角呢間川辣王，原來新開個零月，見佢有酸菜魚食，即刻幫襯！揀咗二人套餐：可以自選一款涼菜、一個乾鍋、一個主菜，仲有兩碗飯同兩杯嘢飲。涼拌：揀咗木耳，不嬲都鍾意食，佢係蒜蓉香醋，酸酸地好開胃！👍🏻乾鍋：可以自選三個配料，我地揀咗魷魚鬚、雞件同蓮藕仔。魷魚鬚好彈牙，雞件走過油，索埋汁好香口，有骨有肉，人人啱食！🥰👍🏻蓮藕仔係酸菜，好開胃～本來想揀蓮藕片～但係佢啲土豆片同蓮藕片都係走過油嘅，朋友唔想太油膩，所以無揀～其實仲有十幾款配菜可以揀，不過套餐只包三款，但都好夠食。招牌菜：可以揀酸菜魚或者水煮魚（其實仲有其他：牛蛙、雞煲、小龍蝦），我哋揀咗酸菜魚，魚湯幾香濃，魚用海鱸魚，魚肉好滑！配菜仲有芽菜、萵筍、同我最愛嘅粗薯粉，所以最後白飯只係要咗一碗，再加兩杯特大檸檬茶，乜都飽晒。甜品：紅糖糍粑，套餐糍粑有四件，細細件，唔會好實，好膩，炸到外脆內軟，加紅糖漿同黃豆粉，完美的句號！個人覺得口味仲好過嗰啲十x味，個味唔會千篇一律，又冇咁油膩…😜😅