胡爐 (已結業)

捱到星期五，點都要食餐好嘅！我哋今晚去食半放題，揀咗醉鴨窩，好似比較少地方食到。 醉鴨窩一上枱嘅時候有啲酒香，慢慢先揮發～ 鴨肉大件多肉，又煮得夠入味，幾好食！食完鴨鍋就開始打邊爐，一開波梗係食海鮮啦！海鮮拼盤好豐富，有五款海鮮。樣樣都幾新鮮㗎，鮑魚同埋海蝦最好食！之後就到食肉～ 可以揀全牛、全豬、或者兩樣都有。 有選擇困難症嘅人就梗係揀兩樣都有啦！黑毛豬豚肉最好食，推介推介👍🏻我哋仲有手工丸餃拼盤，喜歡手打丸都好食，最正係芝心丸，唔係好多芝士，不過口感同味道都幾豐富！火鍋配料都好多選擇可以任叫，不過已經好飽，淨係要咗響鈴、炸魚皮、廣島蠔同埋公仔麵😂😂😂 食完已經飽到上心口。食完今餐真係要開始減肥～