富東粵菜 (已結業)

之前聽幾位嗜食o既同事對呢度o既點心讚譽有加，見佢都幾近老友office，就決定黎試下。周四o既午餐時段，人都唔少，有九成滿座。老友先到，早已剔左四、五樣點心，我黎到佢又雙眼放光咁問侍應再要點心紙，結果兩個女仔叫左八樣點心！先黎o既兩味係蝦餃同炸九肚魚，味道相當唔錯─蝦餃皮薄餡靚，蝦肉好鮮味；九肚魚外皮炸得夠鬆脆，完全唔腥，亦唔太油膩，幾得！珠玉在前，滿心以為跟住幾味都唔差得去邊，點知連最普通o既油菜都好唔掂─相信係切菜o既砧板唔乾淨，令菜葉有股異味﹝為此，乾淨方面o既評分只有一分﹞！咸菜豬肚湯o既豬肚有一陣腥味，令湯水亦帶有少少異味，一人試左一啖就放棄了。流沙包o既內餡本來都唔錯，雖然近皮o既一圈凝固左﹝相信係擺放得太耐至蒸所致﹞，但都算好流同好多餡，味道係Ok的，不過層皮就幾差，薄得黎實的的咁，而且有少少韌。蘿蔔炆魚肚係比較好o既一味，湯味清甜，魚肚份量亦幾多，不過蘿蔔就少D。黃沙豬潤腸粉就係普通貨色，D潤其實唔係太起沙，而且有少少過熟，食落有D硬。最後一味係錦滷雲吞，個雲吞o既外形有D似細個o係街邊炸魚旦檔食倒果種炸雲吞皮，平平的，幾易入口，可惜個餡竟然係一舊「乾箏箏」o既叉燒！