金翠餐廳 (已搬遷) 新店位置

星期六在太子打完波, 打算揾個地方食飯, 路經這間餐廳, 應該係新開張, 咁就入去試下啦......一入到去, 侍應就立即招呼我去卡位坐, 而由於係新開, 所以都好乾淨, 地方都尚算闊落, 坐得都幾舒服......我望一望周圍, 好多人都係食扒, 咁我都試下扒餐啦......我問咗個侍應有咩好介紹, 佢推介咗個金翠牛柳, 而我一向都只係喜歡食牛, 咁就一於食呢個啦......首先來一個紅湯, 個湯肯定唔係罐頭湯, 因為好足料, 味道都唔錯; 然後有一個大餐飽, 都真係幾大個;主菜到 - 金翠牛柳, 原來係一大塊牛柳, 加一條長煙肉, 仲有一隻煎蛋; 而除咗有得選黑椒汁同蒜蓉汁之外, 仲有得加生蒜(咁似曾相識?)牛柳 - 我要五成熟, 真係好大塊, 又淋又冇筋, 加埋啲黑椒汁同生蒜, 真係冇得頂!煙肉同煎蛋 - 煙肉係一大塊, 唔會太肥, 而煎蛋就不過不失, 都幾好味!餐飲 - 要咗杯熱檸茶由於樣樣都份量十足, 食完真係超飽, 跟手埋單, 一共係$82, 冇加一, 相對於大X樂食一個扒餐要$5X, 仲要冇餐飲同埋食完好似冇食過嘢咁, 呢度雖然係貴多少少, 但就真係物超所值, 絶對值得!