有囍 (已結業)

好耐都冇親自去花墟買花，工作上的夥伴結婚影Pre-Wedding，知道我識得紮花，特意邀請我為佢預備一紮簡約的鮮花。禮尚往來就請我喺附近食個晚餐。原來花墟隔一條街已經變成食街，見到鋪頭有囍招牌，加上咁多明星照片力撐，仲唔係你？一於衝入去食勻星馬泰。店內裝修充滿東南亞特色，座椅坐得舒服最緊要。兩個不想動腦筋的人，一於食二人餐 都只不過係＄400，因為好想食海南雞。星加坡海南雞皮滑肉嫩，仲有一碗非一般的油飯，唔油膩但有好香嘅椰香味。仲有星加坡名物肉骨茶，我覺得入口有少少嘅藥材香味，加埋脆卜卜嘅油炸鬼，仲有入晒味嘅排骨，正！青木瓜沙律，高嘅纖維質對腸胃夠晒健康，酸辣開胃。牛油雞翼有好香嘅蒜味，皮脆肉嫩又多汁，香口又惹味。新加坡咖喱魚頭煲，個咖喱唔會好辣但就好香，仲有好特別嘅白茄子，用煲仔上保持住咖喱嘅熱度，魚頭肉夠鮮味。套餐份量真係好大碟，我哋兩個大胃口嘅人都夠飽，感覺超滿足，我飲咗杯 smoothie 超解渴。最驚喜嘅就係套餐加 $48 就配一個椰皇燕窩，一打開個椰子頭，真材實料，啖啖都好多燕窩，又香又滑。回味無窮之餘仲好值得推介。