滿樂中菜 (已結業)

自從知道滿樂喺西九戲曲中心開咗分店之後一直躍躍欲試，目的除咗去捧滿樂場之外，去戲曲中心參觀一下亦係此行嘅樂事。杏汁燉白肺湯，白肺湯清甜潤喉，向來最鍾意食湯渣嘅我，當然要試一試佢呢度嘅白肺，呢度嘅白肺可算係成中數一數二咁出色，招牌不愧係招牌，個肺洗得乾淨呢啲基本嘢不在話下，最重點係佢個肺炆得特別腍，但係個管位依然保持住爽脆，真係超級好食。蜜汁叉燒，呢度嘅蜜汁叉燒蜜味香濃，叉燒唔會話太鹹，旁邊係經過醃漬嘅黃豆，係唔係好多地方食到嘅味道。椒鹽九肚魚，呢度嘅椒鹽九肚魚可以話係演繹咗一碟好食嘅椒鹽九肚魚所需要嘅條件，炸得脆、乾身、仲要起埋骨，法官大人，我無野問喇。 雜菌蒜片炒牛柳粒，牛柳粒選料上乘，豐富嘅牛味同雜菌打成一片。 瑤柱肉餅蒸蟹圈，呢道菜可以話係今晚嘅亮點，賣相精美嘅大肉蟹霸氣十足咁樣騎喺瑤柱蒸肉餅上面，肉蟹新鮮味道自然無懈可擊，底下嘅肉餅唔知係咪特別輕手，啱啱好可以襯托番蟹肉嘅甜味，加埋少少蟹羔嚟送，真係令人口水都流埋。